8千円住雙人房　遊日必住東橫Inn的5大理由　

東橫Inn，日本經濟型連鎖酒店，全國皆見其蹤影，除日本人外，亦是香港人和台灣人入住的熱門酒店。記者作為日本迷，雖然不是每次都入住東橫Inn，但記憶中都有十多次，可以分享一下入住感受。

會員着數多

中學生都可成為東橫Inn會員，入會費1,500円、學生1,000円。成為會員，1,500円不是白花，周日和節日房價折扣20%、平日（周一至周六）是5%，入會當日即可使用。

另外，會員可享住10送1住宿券，但只送單人房，雙人房要補差價。記得在官網訂房才有優惠。

而會員可提前6個月預訂東橫Inn各地酒店，一般非會員只能訂3個月內的booking。這個早訂優惠很重要，當計劃賞櫻花睇紅葉，間間酒店早訂滿或者有房都貴到攞你條命，東橫Inn的價錢十分實惠，因此有心儀日子早訂無煩惱。

▲ 會員證即做即有，填好個人資料後，職員會立即用相機同你影相，幾分鐘新鮮熱辣的會員證便做好，效率極高。（May攝）

房間空間充足

除非五星酒店，日本酒店一般小巧，記者住過價錢與東橫Inn價錢相若的日本連鎖酒店Super Hotel、Comfort Hotel，東橫Inn相比下不算細。

有次住臨急臨忙入住大阪天王寺附近的東橫Inn，由於位處市大醫學部附屬病院附近，這分店設有「療養雙床房」，實質是一間無障礙房間，空間特別大，兩張單人床中間仍有充足空間，房價連稅8千多円，與一般雙床房差不多。

▲ 房間空間足夠而且五臟俱全，風筒、電熱水壺、雪櫃都齊全。（Dora Chan攝）

免費早餐食得飽

東橫Inn的房價包含早餐，老實說，美味稱不上，但算不錯，且一定吃得飽。種類因應不同分店而別，一般是飯糰、麵包、烚蛋、香腸、蔬菜、沙律，飲品有橙汁、味噌湯及咖啡。

部分分店會加入當地特產，如石垣島有苦瓜沙律和炒豬肉料理的沖繩風味、鹿兒島會以紅薯入饌。如兒童入住，不論有否佔床位都享有免費早餐。

▲ 石垣島分店有苦瓜沙律和炒豬肉料理，充滿沖繩風味。（東橫Inn官網）

支持環保減300円

如果連續入住兩日，而毋須清潔房間，第2天的住宿費用會減300円，這做法是為了支持環保，而回饋入房價內。其實住兩、三日又何用天天換床單和打掃。

按摩服務正

部分東橫Inn分店附有按摩服務，上年記者在和歌山分店進行了一個45分鐘的「馬沙池」不用$300港元（註：當時約兌6.5）。

年輕女師傅帶齊架生上房，全程落力無偷懶，手勢雖然不如穴位按摩下下到肉，但也舒服，且不收小費。先旨聲明，能否遇上好按摩師傅靠緣份，閣下遇不到不要打筆者！

【其他熱話】遊日必住 Super Hotel 的理由 每晚慳1500円

【其他熱話】日本賞楓攻略 日本第一紅在哪？

【其他熱話】遊東京與動漫人物集郵　邊度搵多啦A夢？

【其他熱話】遊日必買5大懶人美容法寶

【其他熱話】排毒要食黑胡椒？